रायगढ़ जिला म हरेली तिहार ल पारंपरिक श्रद्धा अउ उत्साह के साथ मनाय गिस। जिला के कई गाँव म ये तिहार एक दिन पहिली मनाय गिस, त कुछ जघा म आज विधिवत आयोजन होइस।
हरेली ल हरियाली अउ समृद्धि के प्रतीक पर्व माना जाथे, जे हर साल सावन महीना के कृष्ण पक्ष के अमावस्या म मनाय जाथे। गाँव के लोगन मन ये तिहार ल लेके सामूहिक पूजा-अर्चना अउ सांस्कृतिक आयोजन करके मनाथे।
ग्राम देवता के जलाभिषेक संग ही गेड़ी चढ़के लईका जवान मन मनाईस खुशी
रायगढ़ के बोईरदादर म हरेली तिहार के मौका म देव मंदिर के पुजारी ह ग्राम देवता ठाकुरदेव, माँ मानकेसरी अउ माँ समलाई के जलाभिषेक अउ दूध अभिषेक करके पूजा करिस।
एकर बाद विनोबा नगर अउ बोईरदादर ले आय श्रद्धालु मन सामूहिक रूप से पूजा-अर्चना करके अपन परिवार के सुख-शांति अउ समृद्धि के कामना करिन। ए बेरा वार्ड के लईका अउ जवान मन गेड़ी चढ़के हरेली पर्व के खुशी मनाइन।
कृषि औजार (खेती के सामान) के होइस पूजा
हरेली तिहार के एक सुग्घर परंपरा के तहत किसान मन अपन कृषि औजार जइसे कुदारी, फावड़ा, गैती अउ हल के विधिवत पूजा करिन। किसान ये तिहार ल जुताई, बोआई अउ रोपाई के काम के बाद विश्राम अउ कृतज्ञता के प्रतीक के रूप म मनाथें।
जिला के कई गाँव म बुधवार के दिन घलो हरेली पर्व मनाय गिस, जेमे गाँव के लोगन परंपरा के मुताबिक पूजा-अर्चना अउ सांस्कृतिक गतिविधि म भाग लेके खुशी मनाइन।
